Carlo Minnaja
Carlo MINNAJA (IFA: [ˈkarlo minˈnaɪ̯a]; naskiĝis la 19-an de marto 1940 en Romo) estas itala matematikisto. Li estas denaska Esperanto-parolanto kaj vortaristo kaj membro de la Akademio de Esperanto.
| Carlo Minnaja | |
|---|---|
.jpg)
| |
| Persona informo | |
| Naskiĝo | 19-an de marto 1940 (84-jaraĝa) en Romo |
| Lingvoj | Esperanto • itala |
| Ŝtataneco | Italio |
| Familio | |
| Patro | Luigi Minnaja |
| Frat(in)o | Nicola Minnaja |
| Okupo | |
| Okupo | esperantisto • verkisto |
| Esperanto | |
| Denaska esperantisto | Jes |
Minnaja magistriĝis pri matematikaj sciencoj en Pizo en 1963; doktoraj studoj pri analitiko ĉe Scuola Normale Superiore, Pizo 1963-65; unua profesorposteno ĉe la ŝipakademio en Livorno en 1965. Poste li iris al la Universitato de Padovo kiel profesoro de la inĝeniera fakultato, pri diversaj matematikaj fakoj; de 1973 li estas konstanta profesoro. Inter 1979 kaj 1994 li estis membro de la Scienca Konsilio de la Instituto pri Komputa Lingvistiko en Pizo. En 1983/84 li estis gastprofesoro Fulbright-a ĉe Virginia Polytechnic Institute kaj University of California en Los-Anĝeleso. Li prelegis ĉe pluraj eŭropaj universitatoj, estas aŭtoro aŭ kunaŭtoro de ĉirkaŭ 50 sciencaj kaj didaktikaj verkoj pri matematiko; verkinto de pluraj libroj kaj multaj artikoloj koncernantaj la internacian lingvon. En 1980 li estis distingita de la Itala Ĉefministro per "Premio de la kulturo".
Minnaja estas membro, senatano kaj vicprezidanto de AIS San-Marino.
En la 1960aj jaroj Carlo Minnaja estis estrarano de TEJO pri fakaj sekcioj kaj servoj.[1] Li tre aktivas pri esperantologio kaj esperanto-literaturo. Li estis ano de la literatura rondo La Patrolo. En 1981 aperis lia traduko en Esperanton "La locandiera" de Carlo Goldoni; en 1982 liaj tradukoj de poemoj de Cesare Pavese; en 1990 li redaktis antologion de tradukitaj italaj poemoj de la 20a jarcento Enlumas min senlimo (Millumino d'immenso), eldonita de LF-Koop.
En 1996 publikiĝis lia pli ol 1400paĝa vortaro itala-esperanta. Ĝi estas la plej ampleksa tiutipa, kiu ĝis nun aperis, kaj komparebla nur kun la samkategoriaj vortaroj germana-esperanta de Krause (2007), la hispana-esperanta de De Diego (2002) kaj la hungara-esperanta de Szerdahelyi kaj Koutny (1996).
Minnaja estas ano de la scienca komitato de Itala Interlingvistika Centro, konstanta kunlaboranto de Literatura Foiro ekde ĝia fondo (ĝia ĉefredaktoro en 2014), kaj regula literatura recenzanto de la magazino Monato.
Li ankaŭ kontribuis al BA2, kaj partoprenis en En la mondon venis nova lingvo, festlibro por Ulrich Lins.
En 2015 li kunaŭtoris (kun Giorgio Silfer) la fundamentan verkon "Historio de la esperanta literaturo", plurfoje premiitan. En 2018 Itala Esperanto-Federacio eldonis lian verkon "Historio de la Akademio de Esperanto".
Notoj kaj referencoj redakti
Eksteraj ligiloj redakti
- Interreta vortaro itala-esperanto Arkivigite je 2013-10-14 per la retarkivo Wayback Machine de Carlo Minnaja
- Vortaro itala-esperanto de Minnaja - hVortaro fare de Danio Manetta: programo por Linukso aŭ Vindozo.
- TTT-ejo de Carlo Minnaja
- biografio (itala) Arkivigite je 2007-03-12 per la retarkivo Wayback Machine
- Infanaĝo dum faŝisma periodo, Militrakonto, 19/10/2019
- Libroj Arkivigite je 2011-07-16 per la retarkivo Wayback Machine de kaj pri Carlo Minnaja en la Kolekto por Planlingvoj kaj Esperantomuzeo Arkivigite je 2007-12-21 per la retarkivo Wayback Machine
- Artikoloj de kaj pri Carlo Minnaja en Elektronika Bibliografio de Esperantaj Artikoloj (EBEA)
|
Trovu « Carlo Minnaja » inter la Vizaĝoj de homoj rilataj al la ideo «Internacia Lingvo» |
