Centro danziger50

Ĉi tiu artikolo estas verkita en Esperanto-Vikipedio kiel la unua el ĉiuj lingvoj en la tuta Vikipedia projekto.

Centro danziger50 (germane Zentrum danziger50) estas kultura kaj arta domo en Berlino Prenzlauer Berg en Danziger Straße 50, malfermita fare de Kulturverein Prenzlauer Berg e. V. (Kulturunuiĝo Prenzlauer Berg r. A.) la 3-an de junio 2006. Ĝi ankaŭ estas sidejo de la kulturunuiĝo.

Dum la inaŭgura ceremonio estis malkovrita la Esperanto-skribo sur la fasado “EN PRENZLOVA MONTO AL APOLONO KAJ AL LA MUZOJ” el la fenestroj de la dua etaĝo fare de malsupren grimpantaj “Junaj Humanistoj”. La vortoj aludas al la skribo sur la fasado de Ŝtata Operejo en strato Unter den Linden „Friedrich II. dem Apollo und den Musen“ (Frederiko la 2-a al Apolono kaj al la muzoj).[1]

Arkitekturo de la domoRedakti

La domo estas origine la direktora domo de la lernejo en la kortego, komence nomita 162-a kaj 197-a komunuma lernejo, ekde 2010 Grundschule im Hofgarten (Baza Lernejo en Korta Ĝardeno). La urba arkitekto Hermann Blankenstein (1829-1910) planis 1892-1894 la tutan ensemblon. Vinzent Dylewski gvidis la konstruadon. Blankenstein en sia ofica tempo kiel Urbkonstrukonsilisto de Berlino 1872-1896 planis kaj konstruigis ĉirkaŭ 120 lernejojn en Berlino. Influita de Karl Friedrich Schinkel (1781-1841) lia arkitekturo estas simpla kaj klara.

Fasado kaj ŝtupara domo danziger50 estas monumente protektita. Floraj ornamaĵoj ĉe la ĉefe ruĝ-brika domo kaptas la atenton. Friso, konsistanta el sesfoliaj rozetoj sur la fasado dispartigas etaĝojn. Kradoj el forĝita fero kaj feraj ornamaĵoj ĉe la fasado estas ornamitaj per floroj, volutojakantoj. En fenestroj de la  ŝtupara domo ekzistas ankoraŭ enfacetitaj fenestretoj kun vito-foliaj ornamaĵoj. La klinkoj de la pordoj al la strato kaj al la korto estas ornamitaj per palmofolioj. Post kiam la kulturunuo transprenis la domon, ĝi estis laŭ monumente protektaj principoj alikonstruitaj.[2]

Fakgrupo EsperantoRedakti

En Centro danziger50 agadas en kvar etaĝoj de la subtegmentejo ĝis la kela koktelejo diversaj kulturaj unuiĝoj, grupoj kaj projektoj.

De junio 2006 ĝis aprilo 2019 en la domo regule kunvenis Fakgrupo Esperanto de la kulturasocio je du lundoj en monato al temaj vesperoj. La Esperanto-grupo jam ekzistas ekde junio 1965, tiutempe kadre de Germana Kulturligo gvidita de Karl Maier. En 1991 ĝi kunfondis la Kulturasocion Prenzlauer Berg r. A. kaj de tiam estis unu el la fakgrupoj en ĝi, unue gvidita de Ulrich Wilke. Ekde 1997 okazis regule la temaj vesperoj, gviditaj de Fritz Wollenberg, tiutempe en Lese- und Galeriecafé „mittendrin“ (Lega kaj Galeria Kafejo „mezmeze“), Bornholmer Straße 18. En 1997 finis la Esperanto-agado en Vilao Kreuzberg, ĉar ĝi transformiĝis al knabina centro. Kelkaj esperantistoj de tie nun venis al Prenzlauer Berg, kaj Gerd Bussing ekde tiam kunpreparis la programon kaj gvidis lingvoekzercajn vesperojn. La fakgrupo partoprenis ankaŭ en eventoj de la kulturasocio kiel en kortaj festoj per stando kaj en la „Sango-festivalo“ per ironie amuza programo „Verda Sango“.[3]

ReferencojRedakti

  1. Germanlinge pri la skribo [1] [2]
  2. Germanlingve pri la alikonstruado de la lernejo [3]
  3. Grupo Prenzlauer Berg en Kafejo Mittendrin, en: Fritz Wollenberg (Red.): Esperanto – Lingvo kaj Kulturo en Berlino: Jubilea Libro 1903 - 2003. Esperanto-Ligo Berlino (Hrsg.), Mondial, Novjorko, Berlino 2006 (Kontribuoj en la germana kaj en Esperanto), p 289-294, ISBN 1-59569-043-3. En Kulturunuiĝo Prenzlauer Berg estas flegata Esperanto-kulturo – Renkontiĝloko Kulturcentro danziger50, en: Fritz Wollenberg (Red.): Esperanto. Lingvo kaj kulturo en Berlino kaj Brandenburgio 111 jaroj, Jubilea Libro 1903-2014, Esperanto-Asocio Berlino-Brandenburgio (Hrsg.), Mondial, Novjorko – Berlino 2017 (Kontribuoj en la germana kaj en Esperanto), p 396-403 ISBN 978-1-59569-340-2