Malfermi la ĉefan menuon
Flag of Europe.svg

La Eŭropa Komunumo pri Atomenergio (EKAEEŭratomo) fondiĝis la 25-an de marto 1957 kadre de la Traktatoj de Romo. Fondaj membroŝtatoj estis Belgio, Francio, Germanio (FRG), Nederlando, Italio kaj Luksemburgio. Ekde la jaro 1965 ĝi estas krom la Eŭropa Komunumo pri Karbo kaj Ŝtalo kaj la same kadre de la Traktatoj de Romo fondita Eŭropa Ekonomia Komunumo (EEK) parto de la Eŭropa Komunumaro (EK), ekde la sekva Traktato de Mastriĥto de 1992 nomata Eŭropa Unio.

Tasko de la Eŭropa Komunumo pri Atomenergio estas, "per la kreo de por la rapida starigo kaj evoluo de atomenergiaj industrioj necesaj kondiĉoj kontribui al la levo de la vivkvalito en la membroŝtatoj kaj al la evoluo de la interrilato kun la aliaj ŝtatoj" (artikolo 1, teksto de la traktato legebla en 23 eŭropaj lingvoj pere de la reta ligilo menciita paĝofine). Same kiel la Eŭropa Komunumo pri Karbo kaj Ŝtalo ankaŭ la EKEA celas plistabiligi la pacon en Eŭropo per la "komunigo", do la reciproka kontrolo, de materio esenca en la kazo de nedezirinda milito inter la ŝtatoj de Eŭropo - ĉi tie la atomenergio estas la fokuso.

la fondaj membroŝtatoj de la EKAE

La unuopaj ĉapitroj de la traktaro precizigas inter alie la subtenon de la esploro pri atomenergio, la disvastiĝo de konoj, la protekto de la sano de la kunlaborantoj de la atomenergia industrio samkiel la tuta enloĝantaro, la kreo de komunaj interŝtataj entreprenoj, la havigo de materialoj necesaj por utiligo de la atomenergio, la kontrolo de la sekureco de la atomenergiaj entreprenoj kaj la atomenergiaj rilatoj kun entreprenoj kaj registaroj de nemembraj ŝtatoj.

Kontraste al la traktato pri la Eŭropa Komunumo pri Karbo kaj Ŝtalo, kiu dum la jaro 1951 estis subskribita por 50 jaroj kaj do finiĝis fine de la jaro 2001, la daŭro de la traktato pri la EKEA estas tempe nelimigita. Krome la traktato - kontraste al pli-malpli ĉiuj aliaj interkonsentoj lige al la unuiĝo de Eŭropo - ekde sia ekvalidiĝo ne estis grave ŝanĝita.

Post la ebla validiĝo de onta "Eŭropa Konstitucio" la traktato pri la EKEA pluvalidos kiel aldona protokolo de tia konstitucio.

Eksteraj ligilojRedakti