Eŭropa fonduso por regiona disvolvigo
La Eŭropa Fonduso por Regiona Disvolvigo aŭ EFRD estas unu el la Eŭropaj Strukturaj Fondusoj. Ĝi celas fortigi ekonomian kaj socian koherecon ene de Eŭropa Unio korektante regionajn malekvilibrojn. Post la plilarĝiĝo de 1973, la malegalecoj ene de la Eŭropa Ekonomia Komunumo pli kaj pli gravis. Ekde en 1972, estis agnoskite necese starigi regionan disvolvan politikon, precipe ĉar la statutoj de la Traktatoj de Romo subskribitaj en 1957 jam starigis la celon redukti regionajn malegalecojn, sed tamen ne sugestis instrumenton por fari tion.
Kreita en 1975, la EFRD estas unu el la financaj instrumentoj de la Eŭropa Unio. Ĝia ĉefa misio estas partopreni en la financado de programoj de loka disvolviĝo prezentitaj de membroŝtatoj al la Eŭropa Komisiono celante precipe redukti regionajn malekvilibrojn kaj la breĉon inter la niveloj de disvolviĝo de la diversaj regionoj de Eŭropa Unio.
Antaŭenigante la redukton de regionaj malegalecoj kaj la ekvilibran disvolviĝon de eŭropaj regionoj, EFRD estas tiel integrita inter la iloj destinitaj por servi la ekonomian kaj socian kohezian politikon enmetitan en la Traktato de Amsterdamo kaj en la Traktato de Mastriĥto.
Por akiri EFRD-helpon, projektaj iniciatintoj devas prezenti projekton konforman al la prioritatoj difinitaj en la regiona politiko de la Eŭropa Unio.