Luis Serrano Pérez

Luis SERRANO PÉREZ (naskiĝis en Osorno, provinco de Palencio en la jaro 1926), estas aktiva hispana esperantisto kaj grava organizanto de la loka movado en la kataluna urbo Sabadell.

Profesie masonisto. Li esperantistiĝis en 1953 pere de “Kurso per korespondado” kiun gvidis Ramón Molera Pedrals. La jaron 1954 li translokiĝis al Asturio (Avileso kaj Ĥiĥono), kie mi ekaktivis loke. Poste li elmigris al Germanio kaj poste al Francio, dum entute tri jarojn. Li edziĝis al esperantistino el Sabadell, kaj translokiĝis al tiu urbo, kreante esperantistan familion.

Dekomence li estas aktiva, dum multaj jaroj li apartenis al estraro de Sabadell Esperantista, poste Centro de Esperanto Sabadell, kie li estis sekretario, kursgvidanto, respondeca pri libro-servo, kaj ankaŭ li okupiĝis pri la kurso per korespondado, organizis programojn, verkis artikolojn por pluraj E-gazetoj, precipe por “Boletín” de Hispana Esperanto-Federacio. Li estis premiita en Konkurso de Intervjuoj (1965) en la kadro de la 7a Barcelona-Provinca Esperantista Renkontiĝo okazinta en Molins de Rei.

Luis Serrano kunfondis la Pacifisman Esperantistan Asocion “Antón Balagué”, kiun li mem prezidis, kaj redaktis ĝian dumonatan organon ekde ĝia fondiĝo, sekve li estis ĝenerala delegito de Mondpaca Esperantista Movado en Hispanio.

De antaŭ multaj jaroj li estas la redaktisto de la revuo "Internaciisto", organo de Internacia Komunista Esperantista Kolektivo.

Li ankaŭ kunfondis “Kulturan Asocion Esperantistan” (KAE) kaj estas unu el ĝiaj estraranoj dum multaj jaroj, inter alie redaktante ĝian organon.

Li estas peranto de pluraj esperantistaj gazetoj. Li ankaŭ estas unu el la ĉeforganizantoj de la Internaciaj Esperanto-Semajnoj de la Kulturo kaj Turismo.