Wilhelmus Johannes Arnoldus Manders

Por aliaj signifoj, bv. rigardi la apartigilan paĝon: Rethel (apartigilo)

Wilhelmus Johannes Arnoldus (Wiel) MANDERS [wil MANders] aŭ pseŭdonime Rethel (naskiĝis la 24-an de aprilo 1910 en Venlo, mortis la 17-an de januaro 1998 en Venray) estis nederlanda esperantisto, docento pri la antikva greka kaj latina lingvoj. Li estis anstataŭanta ekzamenanto de Nederlanda Katoliko. Manders tradukis el la antikva greka Odiseado de Homero en 1932.

Wilhelmus Johannes Arnoldus Manders
Persona informo
Aliaj nomoj	Rethel
Naskiĝo	24-an de aprilo 1910 (1910-04-24) en Venlo
Morto	17-an de januaro 1998 (1998-01-17) (87-jaraĝa) en Venray
Lingvoj	Esperanto
Ŝtataneco	Reĝlando de Nederlando
Okupo
Okupo	esperantisto lerneja majstro

Menciita jam en Enciklopedio de Esperanto (1933), Wiel Manders fariĝis konata pro sia samjara proza traduko el Odiseado, siaj interlingvistikaj verkoj: doktoriĝa disertacio komparanta Volapukon, Esperanton, Idon, Occidental kaj Novial (Vijf Kunsttalen, 1947) kaj la problem-stariga monografio Interlingvistiko kaj Esperantologio (1950), same kiel pro sia lernolibro Esperanto Leerboek (kun C.B. Zondervan, 1952), kiu atingis sep eldonojn ĝis 1995. Manders estis akademiano inter 1954 kaj 1962.

Verkoj

• Vijf Kunsttalen. Vergelijkend onderzoek naar de waarde von het Volapuk, Esperanto, Ido, Occidental en Novial. Diss., J. Purmerend: Muusses, 386 p., 1947
• Interlingvistiko kaj esperantologio. Purmerend: J. Muusses, 77 p., 1950
• "Esperanto kaj lingvistiko". En: Esperantisto, Praha, n-ro 9, p. 102-103, 1947; Espero katolika, n-ro 387, p. 28; n-ro 388, p.4-5, 1947
• "Otto Jespersen kaj liaj helplingvaj teorioj". En: Espero Katolika (1948/49) vol. 44, n-ro 382, p.124; n-ro 383, p. 138-139; n-ro 384, p. 140-150; n-ro 385, p. 171
• "Kunsttalen". En: Levende talen (Groningen 1949), p. 25-42
• "Latino macaronico". En: Esperantologio II (1961), p. 136-138
• "Lingua ignota simplicem hominem Hildegardem prolata". En: Journal of Planned Languages n-ro 15 (julio-aŭgusto 1992), p. 9-12

Recenzoj

Pri Vijf Kunsttalen. Vergelijkend onderzoek naar de waarde von het Volapuk, Esperanto, Ido, Occidental en Novial

„ Ni bedaŭrinde ne havas lokon por ĝin detale recenzi. Ni diru tamen ke ĝia aspektu kaj ĝin enhavo estas tiaj, ke ĉiu Esperanlisto, kiu kapablas legi la nederlandan lingvon, nepre devas ĝin posedi. Ne nur la libro per sia aspekto mem montras la gravecon de la problemo de lingvo internacia, sed ankaŭ ĝi provizos niajn propagandistojn per utilaj konoj pri Esperanto kaj ĝiaj konkurantoj ” — Belga esperantisto n283 (jun 1947)

.

---

Pri Interlingvistiko kaj esperantologio

	„ Tiu ĉi 78-paĝa libro enhavas la jenajn ĉapitrojn: Interlingvistiko kaj Esperanto; La naturalismo de dr Wall kaj Jespersen; tiu de I. A. L. A.; Taskoj de la esperantologio; Evoluo ek- Esperanto; Lingva korekteco; Kompara esperantologio. ” — Belga esperantisto n298 (apr 1950)

Tradukaĵo

• Odusseias de Homeros. Zutphen: W.J. Thieme, s.d.

Vidu ankaŭ

• Sciencaj Studoj bazitaj sur originalaj esploroj kaj observoj