Princino Mononoke

Princino Mononoke (japane: もののけ姫 [mononoke hime]) estas japana animacia filmo de Studio Ghibli publikigita en 1997. La reĝisoro estis Mijazaki Hajao. La muzikon por tiu filmo komponis Hisaiŝi Ĝo. La vorto "Mononoke" (もののけ [mononoke]) signifas fantomon, spiriton aŭ monstron.

Princino Mononoke
animea filmo • original anime
Originala titolo	もののけ姫 [Mononoke Hime]
Produktadlando	Japanio
Originala lingvo	japana
Kina aperdato	12 jul. 1997, 19 apr. 2001, 22 jul. 1996, 19 dec. 1997, 1997
Daŭro	133 minutoj
Ĝenro	animeo
Kameraado	Atsushi Okui
Reĝisoro(j)	Mijazaki Hajao
Produktisto(j)	Toshio Suzuki
Scenaro	Miyazaki Hayao
Loko de rakonto	Japanio
Muziko de	Hisaiŝi Ĝo
Produktinta firmao	Studio Ghibli
Honorigoj	Animation Kobe Theatrical Film Award • Japan Academy Prize for Picture of the Year
IMDb

Intrigo

La rakonto situas en fantasta mondo simila al Japanio antaŭ ĉirkaŭ 500 jaroj. La juna princo Aŝitaka de la tribo Emiŝi estas vundata kaj venenata, kiam li provas protekti kelkajn junulinojn kontraŭ monstra spirito el la arbaro. Pro tio li devas forlasi sian hejmlandon kaj li komencas serĉi rimedon kontraŭ sia malsano. Baldaŭ li trafas al mezo de granda batalo inter la supernaturaj spiritoj de la arbaro, protektante la arbaron kaj la homoj, kiuj volas uzi la riĉaĵojn de la arbaro por konstrui civilizacion. La fortoj de la arbaro estas kondukataj de homa junulino, "princino Mononoke", kiu estis adoptita de la lupa "diino Moro" kaj konsideras sin mem lupino.

Ĉefaj roluloj

• Aŝitaka (アシタカ [aŝitaka])

Juna princo de la popolo Emiŝi, la protagonisto de la filmo. Lia nomo laŭvorte signifas "ĉu (estos) morgaŭ?".

• San (サン [san])/ Princino Mononoke (もののけ姫 [mononoke hime])

Junulino vivanta kun la lupaj dioj en la arbaro.

• Baronino Eboŝi (エボシ御前 [eboŝi omae])

Fondintino kaj ĉefo de la metalurgia vilaĝo.

• Diino Moro (モロの神 [moro no kami])

Lupa diino kaj adopta patrino de San.

• Gonza (ゴンザ [gonza])

Sekvantulo de Baronino Eboŝi, li estras la gardistojn kaj la bovgvidantojn

• Koroku (甲六 [kōroku])

Bovgvidanto vundita en la batalo kontraŭ la lupoj.

• Toki (トキ [toki])

Kuraĝa virino el la metalurgia vilaĝo, edzino de Koroku.

• Monaĥo Ĝiko (ジコ坊 [ĝiko bō])

Elsendita de la unio de la majstroj, li volas la kapon de Ŝiŝigami.

• Ĉefo Okkoto (乙事主 [okkotonuŝi])

Apra dio el Kjuŝuo, li postulas la militon kontraŭ la homaro.

• Ŝiŝigami / Didaraboĉĉi (シシ神 [ŝiŝigami]/ ディダラボッチ [didaraboĉĉi])

Granda dio de la bestoj de la arbaro (taga/ nokta formo).

Filmo

La filmo "Princino Mononoke" aperis en 1997 en Japanio en la kinejoj kaj enportis 19,3 miliardojn jenojn (ĉirkaŭ 180 milionoj usonaj dolaroj). Kun 14,2 milionoj kinaj aspektantoj en Japanio tiu filmo iĝis numero 1 de ĉiuj filmoj, nur superita en 2001 de alia filmo de Mijazaki: La vojaĝo de Ĉihiro.

"Princino Mononoke" aperis en 1997 ankaŭ en LD (laserdisko), kaj en 1999 en kelkaj Usonaj kinejoj, poste tiu filmo aperis en DVD voĉtratukita en multajn lingvojn.

Titolo en aliaj lingvoj

lingvo	titolo	signifo
angla	Princess Mononoke	princino Mononoke
ĉeĥa	Princezna Mononoke	princino Mononoke
finna	Prinsessa Mononoke	princino Mononoke
franca	Princesse Mononoké	princino Mononoke
germana	Prinzessin Mononoke	princino Mononoke
greka	Πριγκίπισσα Μονονόκε	princino Mononoke
hebrea	הנסיכה מונונוקי	la princino Mononoki
hispana	La princesa Mononoke	la princino Mononoke
hungara	A vadon hercegnője	princino de la densarbaro
itala	Principessa Mononoke	princino Mononoke
japana	もののけ姫	princino Mononoke (princino de la fantomoj/spiritoj/monstroj)
kroata	Princeza Mononoke	princino Mononoke
mandarena	魔法公主	magia princino
norvega	Prinsesse Mononoke	princino Mononoke
pola	Księżniczka Mononoke	princino Mononoke
rusa	Принцесса Мононокэ	princino Mononoke
slovaka	Princezná Mononoke	princino Mononoke

Libroj

En 1997 en Japanio aperis ankaŭ la kolorplena kvar-voluma filmkomikso pri "Princino Mononoke" eldonita de Tokuma Shoten. Poste filmkomiksoj en diversaj lingvoj sekvis, ekz. en Germanio 2000 en la Carlsen Verlag.