Kunaĵo

La kunaĵo aŭ kunigaĵo de du aroj A kaj B estas la aro, kiu entenas precize tiujn elementojn, kiuj apartenas aŭ al A aŭ al B. La kunaĵon de A kaj B oni signas per A ∪ B (legu a kun bo aŭ a aŭ bo):

$A\cup B=\{x:x\in A\vee x\in B\}$

Pli ĝenerala nocio estas kunaĵo de arbitra familio de aroj:

$\bigcup _{i\in I}A_{i}=\{a:\exists i\in I(a\in A_{i})\}$

Formala difino

Se $\{X_{i}\}_{i\in I}$ estas aro de aroj, do la kunigaĵo $\textstyle \bigcup _{i\in I}X_{i}$ estas la jena aro:

$\forall x\colon x\in \bigcup _{i\in I}X_{i}\iff \exists i\in I\colon x\in X_{i}$.

Se la aro de aroj konsistas el nur du elementoj, do la kunigaĵo $X\cup Y$ de du aroj $X$ kaj $Y$ estas la aro, tia ke elemento $x$ apartenas al $X\cup Y$ se kaj nur se

• x apartenas al $X$ aŭ
• x apartenas al $Y$.

La konjunkcio "aŭ" tie ĉi estas ne-ekskluziva; elementoj, kiuj estas en ambaŭ aroj, estas en la kunaĵo.

Speciale, se $I$ estas la malplena aro, do la kunigaĵo de nul aroj estas la malplena aro:

$\bigcup \varnothing =\varnothing$.

Ecoj

La kunigo de aroj estas komuta (kio ne tuj evidentas el la prepozicio "kun") kaj asocia.

Ekzemplo

Ekzemple la kunaĵo el la aroj {1,2,3} kaj {2,3,4} estas {1,2,3,4}. La nombro 9 ne apartenas al la kunaĵo de la aro de primoj {2,3,5,7,11,...} kaj la aro de paraj nombroj {2,4,6,8,...}, ĉar 9 estas nek primo nek para nombro.

Vidu ankaŭ

• Komunaĵo
• Aroteorio
• Komplemento