Maulbronn
Maulbronn estas urbeto en Baden-Virtembergo (Baden-Württemberg), Germanio (koordinatoj: 49° 0′ N, 8° 49′ O). Ĝi evoluis ĉirkaŭ Cisterciana monaĥejo fondita en ĉi-loko en 1147.
En 1886 Maulbronn oficiale fariĝis urbo kaj restis administra centro ĝis 1938. Post la Dua Mondmilito multaj senhejmigitaj personoj (angle: displaced persons) venis al Maulbronn kaj konsiderinde pligrandigis la nombron de la loĝantoj.
Aparte grava estis la monaĥejo. Ĝi havis grandan influon ĝis, en 1504, ĝi estis sieĝata kaj okupata de la duko de Virtembergo. Post la reformacio ĝi estis transformita al protestanta seminario (Evangelischen Seminare Maulbronn und Blaubeuren) funkcianta ĝis hodiaŭ.
Hermann Hesse, kiu mem estis lernanto en la seminario, priskribis ĝin en "Sub la rado" (Unterm Rad), novelo kun aŭtobiografiaj trajtoj.
En 1993 la monaĥejo estis registrita kiel Monda Heredaĵo de UNESCO. Famaj personoj, kiuj estis lernantoj en la seminario (enkrampe la tempo de lernanteco tie):
- Johannes Kepler (1586–1588)
- Friedrich Hölderlin (1786–1788)
- Justinus Kerner (1795–1797)
- Georg Herwegh (1831–1833)
- David Friedrich Weinland (1843–1847)
- Hermann Hesse (1891–1892)
