Carlsen
La eldonejo Carlsen — germane Carlsen Verlag — estas germanlingva libroeldonejo de precipe bildstrioj kaj de porinfana literaturo. Ĝi laŭ la stato fine de 2012 apartenas al la sveda konzerno Bonnier. Fokuso de la produktado estas tre vasta gamo da bildstrio, kaj porinfanaj kaj porplenkreskulaj, porinfanaj kaj poradoleskulaj romanoj, ekzemple la germanlingvaj tradukoj de la romanoj pri Harry Potter, kaj post aĉeto de la germanie ekonomie gvida eldonejo de porinfanaj komputilaj programoj, Terzio, en 2012 ankaŭ estas signifa produktanto de edukaj komputilaj programoj. En ĉiuj tiuj branĉoj, la eldonejo estas inter la ekonomie plej sukcesaj germaniaj firmaoj. Firmaestroj laŭ la stato fine de la jaro 2012 estas Renate Herre (kiel gvida eldonistino) kaj Joachim Kaufmann.
| Carlsen | ||
|---|---|---|
| Carlsen | ||
 la centra oficejo de la eldonejo en Hamburgo | ||
| eldonejo • libroeldonejo • bildliteratureldonejo vd | ||
| Dum | 1899 - nekonata/nuntempe | |
| Jura formo | Gesellschaft mit beschränkter Haftung | |
| Fondita | 1953 | |
| Sidejo | Hamburgo | |
| Lando | Danio | |
| Estr(ar)o | Renate Herre, Joachim Kaufmann | |
| Agokampo | bildliteraturo | |
| TTT | carlsen.de | |
La eldonejo fondiĝis en 1953 fare de Per Hjald Carlsen kiel germania filio de la dana eldonejo Carlsen, parto de la eldona grupo Illustrationsforlaget/PIB, kaj havas sian centran sidejon en Hamburgo. Komence la eldona programo precipe ekzistis el bildlibroj pri la urso "Petzi" kaj liaj amikoj, kiuj en Germanio jam konatis pro pluaj bildstrioj publikigitaj en germanaj gazetoj. En 1954 ekpublikiĝis la unuaj miniaturaj porinfanaj "Pixi-Bücher" ("piksi-libroj") en formato de nur 10 oble 10 centimetroj.
En 1967 la eldonejo komencis publikigi bildstriajn volumojn per unua germanlingvigita albumo el la serio Tinĉjo kaj Miluo. La programo pliampleksiĝis unue per pliaj tradiciaj, origine franclingvaj belgiaj kiel Alix, Blake & Mortimer, Valerian & Veronique kaj la Smurfoj (Les Schtroumpfs/Die Schlümpfe). Komence de la 1980-aj jaroj aldoniĝis la serioj pri Spirou & Fantasio, pri la oficeja mesaĝisto Gaston kaj pri Leonardo. La produktado kontinue pliampleksiĝis, en 1989 aperis pluraj koloraj albumoj ĉiumonate. Komence de la 1980-aj jaroj fondiĝis la serio Edition ComicArt por plenkreskulaj legantoj, kaj ĝi kontinue pliampleksiĝis. La dana serio de komiksaj libroj Valhalla, origine komisiita por kaj publikigita de Interpresse, estis publikigita de Carlsen Comics ekde 1987.
Komence de la 2000-aj jaroj sekvis la unua germanlingva publikigo de la mangao Dragonball kaj sekvis multaj pliaj tiustilaj japanaj bildstrioj: la fenomeno de mangaoj tiel en Germanlingvio establiĝis precipe fare de la eldonejo Carlsen.
La plej granda ekonomia sukceso tamen estis ne bildstrio, sed la romana serio pri la juna sorĉisto Harry Potter de la britino Joanne K. Rowling, en germana traduko eldonita en la eldonejo: Jam ankaŭ komenciĝo de ekonomia sukceso de la libroserio, tuj post publikiĝo de la unua el planitaj sep volumoj en Britio, la eldonejo Carlsen aĉetis la germanlingvajn rajtojn por ĉiuj estontaj sep volumoj. Sekve la germana eldonejo ne devis obei la dezajnajn normojn de la usona eldonejo Time Warner, kiam tiu aĉetis ĉiujn kromajn rajtojn. Ankaŭ pri la varbado pri la libroj la germana eldonejo havis signife pli da libero ol Harry-Potter-eldonejoj en aliaj landoj. Ĝis nun la sep romanoj pri Harry Potter en Germanlingvio atingis eldonkvanton de 30 milionoj da ekzempleroj [1]
La dana eldonejo el kiu la germana firmao origine fontis, dumtempe ankaŭ apartenis al la sveda konzerno Bonnier, sed poste post pluraj vendoj ekde la jaro 2007 estas parto de la internacia eldona konzerno Egmont: sekve de pluraj jaroj la samnomaj eldonejoj en Danio kaj Germanio ne plu estas komerce ligitaj.
En 2012 la germana eldonejo Carlsen aĉetis la rajtojn de la germanie ekonomie gvida eldonejo de porinfanaj komputilaj programoj, Terzio, konata precipe pro la en familioj de Germanlingvio sukcesaj kanzonaj-rakontaj infanlibroj, filmetoj kaj komputilaj ludoj de la serio Ritter Rost, sed ankaŭ aktiva pri multaj pliaj serioj de (je granda parto plurlingvaj) komputilaj programoj pri vasta gamo de aliaj fikciaj roluloj, kaj de tiam ankaŭ estas signifa produktanto de edukaj komputilaj programoj. La eldonejo Terzio tamen pluekzistos kiel aparta marko, ties eldonistoj Möllers kaj Bellinghausen plu (licence) komercas ĉiujn muzikajn, teatraĵajn, filmajn, televidajn kaj ĉiujn kromajn rajtojn de "ilia" serio Ritter Rost, kaj per la serio edition quinto ili ankaŭ estonte pluaktivos kiel eldonistoj de porinfanaj libroj kaj sonlibroj.
Por plia internacia distribuo de la produktaĵoj la kunlaborantoj de la eldonejoj Carlsen kaj Terzio kompreneble intense kunlaboras kun alilandaj eldonejoj kaj tial prezentiĝas en internaciaj librofoioj kiel ekzemple la frankfurta librofoiro en Germanio.