Celestin Rousseau

Célestin ROUSSEAU [ruso], (ps. Aspido), naskiĝis la 22-an de septembro 1861 en Le Portel (apud Boulogne-sur-Mer), mortis en 1949, estis franca farmaciisto kaj Esperanto-vortaristo, membro de la Lingva Komitato de 1924, sekretario de la sekcio pri teknikaj vortaroj de la Akademio de Esperanto kaj de 1933 ĝia direktoro.

Celestin Rousseau
Persona informo
Aliaj nomoj	Aspido
Naskiĝo	22-an de septembro 1861 (1861-09-22) en Le Portel
Morto	19-an de januaro 1949 (1949-01-19) (87-jaraĝa)
Lingvoj	Esperanto
Ŝtataneco	Francio
Okupo
Okupo	esperantisto apotekisto
Esperanto
Esperantisto numero	7415

Karikatura bildkarto el ĉ. 1913

Rousseau aktivis kiel paroladisto ĉe la Societoj de Ruĝa Kruco. Li estis komitatano de diversaj farmaciistaj societoj en Francio kaj korespondanto de eksterlandaj societoj. Plurfoje li raportis ĉe Internaciaj Kongresoj de Farmaci-societoj pri la Unueco de la Sciencaj Nomenklaturoj. Li verkis plenan liston de la drogoj de 16 naciaj farmakopeoj kun Esperanta traduko.

Rousseau esperantiĝis en 1902. Li fondis grupon en Levallois-Perret kaj estis komitatano de la Societo Esperanto-Croix-Rouge. Administranto de SFPE (1912-1922). Sekretario de la Internacia Scienca Asocio Esperanta (ISAE). Organizis kun Maurice Rollet de l'Isle la Internacian Konferencon por la Scienco, Parizo, en 1925. Rousseau ankaŭ estis vicprezidanto de la Pariza grupo kaj ĝenerala sekretario de „La Maison de l' Esperanto“, de la fondo (1928).

Verkoj

Li skribis en „Scienca Revuo“, „Internacia Medicina Revuo“ k. a. periodaĵoj kaj verkis:

• Poliglota Vademecum de Internacia Farmacio, 1911, kies unu volumo liaepoke ekzistis en multaj Universitataj bibliotekoj en la mondo, kaj en kiu Esperanto estas la ĉefa lingvo.
• Raporto pri farmaciarto. En Internacia konferenco Esperanto en moderna vivo, <Paris, 1937>, Raportoj kaj konkludoj (Esperanto en lernejoj, sciencoj kaj teknikoj, internacia trafiko, intelektaj interŝanĝoj), 1937, p. 96-98
• Amo: Fonto de Vivo. Eld. Esperantista Centra Librejo, Parizo, 1939(?)

	„ Lingvo riĉa kaj viveca. Temo—la alegorio Edena —iom malfreŝa. Sole kritikinda estas geambaŭ (pp. 14, 16). Kurioza ritmo, kiu lamas unu fojon, pro rimigo de ĉiel' kun ĉiel (p. 11). Preso, papero, kaj aspekto, bonaj. ” — MASON STUTTARD. La Brita Esperantisto - Numero 416, Decembro (1939)

Eksteraj ligiloj

• Libroj de kaj pri Célestin Rousseau en la Kolekto por Planlingvoj kaj Esperantomuzeo
• Poliglota Vade-Mecum de Internacia Farmacio, extracta ex diversis Pharmacopoeis cum Vocabulario ex 9 Linguis : per Esperanto / verkita de Célestin Rousseau. - Paris : Hachette, 1911. digital