Ruĝeca ajmofilo

La Ruĝeca ajmofilo (Aimophila rufescens) estas specio de birdoj de la familio de Emberizedoj kaj genro de Ajmofiloj, kiu enhavas speciojn kun rimarkindaj kapobildoj.

Kiel legi la taksonomion Ruĝeca ajmofilo
Ruĝeca ajmofilo
Biologia klasado
Regno: Animaloj Animalia Filumo: Ĥorduloj Chordata Klaso: Birdoj Aves Ordo: Paseroformaj Passeriformes Familio: Emberizedoj Emberizidae Genro: Aimophila Specio: A. rufescens
Dunomo
Aimophila rufescens (Swainson, 1827)
Konserva statuso
Konserva statuso: Malplej zorgiga
Aliaj Vikimediaj projektoj

Aimophila rufescens 1902

Ĝi estas malgranda birdo troviĝanta en Belizo, Kostariko, Salvadoro, Gvatemalo, Honduro, Meksiko kaj Nikaragvo. Resume la teritorio okupas el nordokcidenta Meksiko al Kostariko. Ties natura biotopo estas subtropikaj aŭ tropikaj sekaj arbaroj, humidaj montararbaroj kaj altaltitudaj arbustaroj.

Karakteroj

Ĝi estas ĉirkaŭ 18.5 cm longa kaj pezas ĉirkaŭ 36 g. Ĝi havas tre ruĝecan kaj larĝan kronon iom bordita je nigro komence kaj tre rimarkindan nigran mustaĉan strion kun supra blanka ne tiom markata strio. La dorso estas bruna malhele strieca, la flugiloj kaj vosto havas ruĝecbrunajn plumojn kun malhelaj bordoj. La okulringo estas blankeca kaj estas ankaŭ malhela traokula strio, la vangoj estas grizaj kun oliveca nuanco, la kolflankoj estas grizaj kaj la gorĝo estas blanka inter la nigraj mustaĉoj. La beko estas griza kaj la kruroj rozkolorecaj.

La ruĝecaj dorso kaj ĉefe krono estas sufiĉaj kialoj por kaj la komuna nomo kaj la latina scienca nomo kiu signifas simile.

Vivejo

Ties natura biotopo estas mal- al mezaltaj partoj de montoj, kun savano, makiso, arbaroj de pinoj kaj kverkoj kun disaj arboj, kaj duarangaj arbaroj, ĉiam kun abundo de arbustoj. Eblas vidi ĝin ankaŭ en kelkaj aliaj geografiaj zonoj, kiaj iamaj ĝangaloj.

Ili manĝas semojn, insektojn kaj aliajn senvertebrulojn. Ili nutras sin surgrunde inter arbustoj, formante malgrandajn familiajn grupojn.

Distribuado

El nordo de Sonoro (Meksiko) laŭlonge de la Okcidenta Patrinmontaro kaj el sudo de Novleono laŭlonge de la Orienta Patrinmontaro ĝis la Sierra Nevada (Meksiko). Ankaŭ en la Suda Patrinmontaro. Ĝi loĝas ankaŭ sude de Verakruco, norde de Oaĥako kaj en altaj kaj malaltaj zonoj de Ĉiapaso. En Centrameriko ties distribuado laŭlongas de la montaj regionoj, al okcidenta Nikaragvo kaj pleja nordorienta Kostariko, kie ĝi loĝas en la deklivaro al Pacifika Oceano ĉe la vulkanoj de Guanacaste. Estas ankaŭ kelkaj populacioj en malaltaj zonoj de Belizo kaj Salvadoro.

Referencoj

• Roger Tory Peterson kaj Edward L. Chalif. 2008. Aves de México. Guía de campo. Editorial Diana, México. ISBN 978-968-13-3207-5
• Howell, Steve N.G., kaj Sophie Webb. 2007. A guide to the birds of Mexico and northern Central America. Oxford University Press, Estados Unidos. ISBN 978-0-19-854012-0
• Sada, A.M.; Phillips, R., kaj Ramos, M.A. 1984. Nombres en castellano para las aves mexicanas. Publicación de Divulgación No. 17. Instituto Nacional de Investigaciones sobre Recursos Bióticos. México. Citita de Peterson kaj Chalif (2008).
• Aimophila rufescens, konsultita la 29-a de novembro de 2010, Instituto Nacional de Biodiversidad de Costa Rica, en hispana Arkivigite je 2013-03-16 per la retarkivo Wayback Machine
• [url=http://www.iucnredlist.org/details/149728/0 Aimophila rufescens, Ruĝa Listo de IUCN, konsultita la 29-a de novembro de 2010, IUCN, en angla]
• BirdLife International 2004. Aimophila rufescens. 2006 IUCN Ruĝa Listo de Minacataj Specioj. Konsultita la 25an de julio 2007.