Giubiasco

Por samtitola artikolo vidu la paĝon Giubiasco (stacidomo).

Giubiasco estas komunumo de la komunumaro Giubiasco kaj la distrikto Belinzono en Kantono Tiĉino, Svislando. Ĝi havis 8364 loĝantojn je la 31-a de decembro 2011.

Giubiasco
Blazono de Giubiasco
Blazono de Giubiasco
Giubiasco, rigardo el la rapidtrajno de Belinzono al Lugano
Giubiasco, rigardo el la rapidtrajno de Belinzono al Lugano
Kantono	Tiĉino
Distrikto	Belinzono
Komunumaro	Giubiasco
Koordinatoj	46° 10′ 35″ N 9° 0′ 45″ O (mapo)
Nombro de loĝantoj	8364
Areo	6,23 km²
Alteco	242 m super marnivelo
Poŝtkodo	6512
Komunumkodo	5005
Mapo de Giubiasco
Mapo de Giubiasco

Geografio

Giubiasco situas en la ebenaĵo de Magadino ĉe la suda flanko de la montpasejo Monte Ceneri, sudokcidente de la kantonĉefurbo Belinzono. La komunumo, kiu apartenas al la aglomeraĵo de Belinzono, konsistas el la kernvilaĝo Giubiasco kaj la vilaĝoj Palasio, Pedvilla, Lôro, Motti kaj Sasso Piatto.

La teritorio de la komunumo etendiĝas sur areo de 6,23 km², de kiuj 19,3% estas kovritaj de arbaro, 38,5% servas por agrikulturo kaj 40,9% por setlado.

Najbaraj komunumoj

La komunumo Giubiasco limas en nordo al Monte Carasso, en nordoriento al Belinzono, en oriento al Pianezzo, en sudo al Camorino, en sudokcidento al Sant'Antonino, en okcidento al Gudo, kaj en nordokcidento al Sementina.

Trafiko

Tra Giubiasco pasas la kantona ĉefvojo n-ro 2, kiu kondukas de Belinzono tra la montopasejo Monte Ceneri al Lugano, kaj la svisa aŭtovojo A2, kies plej proksima alveturejo Belinzono-Sudo situas 1 kilometron sude de la komunumo sur la teritorio de la komunumo Sant'Antonino. La stacidomo de Giubiasco situas ĉe la trajnlinio de Lucerno trans Gotardo al Chiasso. En Giubiasco de ĝi disbranĉiĝas la trajnlinio al Locarno. Krome en Giubiasco cirkulas diversaj buslinioj de la loka busreto de Belinzono.

Historio

La unua dokumenta mencio de Giubiasco datiĝas el la jaro 1186 kiel Cibiascum, kiam la imperiestro Barbarossa koncedis en Giubiasco la liberecrajtojn por la regiono de Locarno. Proksime de la stacidomo estis trovita vasta tombejaro kun 565 tomboj de la 11-a jarcento antaŭ Kristo ĝis la frua mezepoko. Dum mezepoko Giubiasco apartenis al la Grafejo Belinzono. Post la Batalo de Arbedo en la jaro 1422 ĝi estis submetita al la suvereneco de la dukoj de Milano, ĝis en la jaro 1499 ĝi estis konkerita de la Svisa Ĵurkomunumo kaj submetita al la Voktejo Belinzono. Post la kreo de Kantono Tiĉino en la jaro 1803 ĝi fariĝis ĉefloko de la komunumaro Giubiasco en la Distrikto Belinzono.

Vidu ankaŭ

• Komunumaro Giubiasco
• Giubiasco (stacidomo)

Eksteraj ligiloj

• Oficiala retejo de la komunumo Giubiasco

•  Vidu ankaŭ en la Vikimedia Komunejo la kategorion Giubiasco – (Kolekto de bildoj kaj plurmediaj dosieroj)

Bildoj

• 
  Fervojdisbranĉiĝo de la linioj de Belinzono al Lugano kaj de Belinzono al Locarno.
• 
  La stacidomo de Giubiasco, fotita el veturanta eksprestrajno
• 
  Agrikultura kaj industria zono en la Magadino-ebenaĵo en Giubiasco