| „ Por la adeptoj de movado bazita sur persona kreaĵo, biografio de la kreinto estos ĉiam inter la libroj plej multe legataj de ĝiaj adeptoj. Tial la unua eldono de ĉi tiu senmorta verko de Edmond Privat trovis konstantan legantaron inter la Esperantistoj. Tiu eldono, kiu elvenis en la kadro de la Memoriga Biblioteko Bolingbroke Mudie, lastatempe elĉerpiĝis, kaj nun anstataŭas ĝin dua eldono de E.P.C., kun ties konataj bindaĵo kaj formato, 12 bildoj —el kiuj kelkaj estas novaj, kaj nova antaŭ- parolo speciale verkita de Robert Robertson.
La aŭtoro, fervora Zamenhofano jam en frua aĝo, priskribas en flua, klara, simpla, emocia stilo la geografian, etnikan, kaj familian kadron, en kiu naskiĝis Zamenhof; la burĝonadon ĉe li de la ideo pri mondlingvo ; la longan, solecan laboron kaj ĝian finan kompletigon ; la fruajn klopodojn de la kreinto kaj la pioniroj—liaj fidelaj apostoloj ; la kongresojn antaŭ la mondmilito; la homaranismajn konceptojn de Zamenhof; kaj lian tro fruan morton meze de tiu milito, kiu rompis lian koron, sed ne sukcesis frakasi lian esperemon.
Tiun resumon ni prezentas por la novaj Esperantistoj, sed mi bone scias, ke ĉiuj malnovaj samideanoj bone konas la enhavon de la verko. Kiu el ili ne trezore konservas sian ekzempleron? Por multaj ĝi estis la unua fonto de inspiro; al ĝi ih sin turnas ĉiun 15-an de decembro por refreŝigi siajn konceptojn pri la persono de nia fondinto, aŭ por trovi materialon por artikoloj kaj paroladoj okaze de la datreveno de la naskiĝo de la majstro; kaj ĝin ili mem senlace relegas, kaj insiste rekomendas ĝian legadon al ĉiu nova aliĝinto al nia afero.
Granda katastrofo estus por nia movado, se iam tiu klasika verko ne estus plu havebla. Des pli grandan dankon ni ŝuldas al E.P.C. pro la nuna reeldono, kaj ni deziras grandan sukceson al Vivo en ĝia nova vesto. ” |
Tiu verko estas (tute aŭ parte) entenata en la rete alirebla Tekstaro de Esperanto.
Kovrilpaĝo de Vivo de Zamenhof, 5-a eldono, 1977, Aŭstralio..jpg)
