Malfermi la ĉefan menuon
Alois Musil 1901

Alois MUSIL (naskiĝis la 30-an de junio 1868 en Rychtářov apud Vyškov - mortis la 12-an de aprilo 1944) estis ĉeĥa arabisto, bibliisto, vojaĝisto kaj verkisto de tutmonda signifo.

Li studis teologion en Olomouc, en 1891 li fariĝis pastro, en la jaroj 1895-1898 li daŭrigis teologiajn studojn en Jerusalemo kaj Bejruto kaj tiel li komencis interesiĝi pri la araba mondo. Tiutempe li malkovris palacon Kusajr Amra kaj verkis pri ĝi latinlingvan duvoluman libron. En kvarvoluma verko li priskribis Jordanion.

Ankoraŭ antaŭ la unua mondmilito li entreprenis ekspediciojn al Palestino, Sirio, Arabio kaj Mezopotamio, faris esplorojn geografiajn, etnografiajn, folklorajn kaj politikajn, kiuj ĝis nun estas gravaj fontoj pri la araba kulturo. Li akiris admirindajn lingvajn sciojn. Li estis komisiita ankaŭ de politikaj taskoj repacigi militantajn tribojn (du el ili nomumis lin sia ŝejko). Ĉe la Universitato de Karolo en Prago li fariĝis profesoro de arabistiko.

Siajn sciencajn verkojn, kiujn li skribis en diversaj lingvoj, li kompletigis per aventuraj romanoj por geknaboj, en kiuj li propagandis araban kaj islaman kulturon (Cedroj ĉe Libanono, Unuafoje en la dezerto, Venĝanto, Roka urbo, Filo de dezerto k.a.).

Eksteraj ligilojRedakti